Transcript

Transcript

f.5r

Ex literis clarissimi & amplissimi uiri, domini Eb. Reidani in-
tellexi, cupere te legere ea, quae de errorib. blasphemis Dauidis
Georgii haeresiarchae sunt a me congesta, sed copiam exemplaris non
habere. Itaque mitto per hunc ciuem uestrum exemplar, oroque ut
tenuissimum μνημόσυνον ab amico & contubernali uetere, ac stu-
diorum socio habere non dedigneris. Mihi pergratum erit, si
hoc officiolum in occasionem refricatae amicitiae, quae locorum interca-
pedine inter nos, & silentio literarum diuturno pene intermortua est, nobis
uertatur. Si loci ratione, coniunctis nobis esse non licet, animis
& commeantib. utrinque literis, animorum internunciis, licet. Nosti 
genium meum, sectantem & colentem amicitiam sincere ac sine
pompa: qualem te quoque ego quondam noui; nec alium etiam nunc te
esse plane persuasum mihi habeo. In quo si erro, errorem amico
& uiro bono dignum committo. Bene enim & honeste de amico
uetere sentio. Arbitror uero, disparem fortunam nostram impedimento 
amicitiae esse non debere: quippe qui sciam, etiam principes mag-
nos cum tenuissimis hominib. sed bonis, amicitiam coluisse. Plura
non sinit animus ad alia festinans. Vale Amplissime Consul, cum
familia tua & tota rep. meque in tuorum numero esse patere.
Raptim die VI Novemb. anno M.D.XCIX.            Groningae.
                                                                  Ampl. tuae obseruans
                                                                               ​​​​​​Vbbo Emm.

f.5v

Amplissimo uiro, doctrina,
uirtute, dignitate praestantis-
simo, domino Arnoldo Tullichio,
ciuitatis Arnhemiensis Con-
suli prudentissimo, amico
                            suo colendo.